Amerikalik xonanda Sabrina Karpenter o‘zini ta’qib qilayotgan Uilyam Epplgeyt ismli erkakka nisbatan himoya orderi (taqiqlov qarori) chiqarishni so‘radi.
Los-Anjeles sudi xonandaning murojaatini qanoatlantirdi. Karpenterning ma’lum qilishicha, Epplgeyt kamida to‘rt marta uning shaxsiy hayotiga aralashgan. Xususan, 23-may kuni u xonandaning uyi eshigigacha borib, eshikni kuch bilan ochishga uringan. Erkak qo‘riqchilarga go‘yoki Sabrina uni kutayotganini aytgan. Xonanda esa bu gaplarni “mutlaqo yolg‘on va asossiz” deb atadi. Qo‘riqchi uni ichkariga kiritmaganidan so‘ng, Epplgeyt xavfsizlik xodimiga hujum qilgan.
Shundan keyin erkak noqonuniy kirishga urinish gumoni bilan hibsga olingan. Biroq oradan bir kun ham o‘tmay, u yana Karpenter yashaydigan hududda paydo bo‘lib, uy atrofida aylanib yurgan.
Yana bir holatda u mashinasini xonanda uyi yaqiniga qo‘yib, uning harakatlarini kuzatgan. Xavfsizlik xizmati tekshiruvlari Epplgeyt 20-apreldan buyon muntazam ravishda shu hududga kelib, asta-sekin xonandaning uyiga yaqinlashib borganini aniqlagan. May oyining oxirida sudga topshirilgan arizada Sabrina Karpenter ushbu erkak bilan hech qachon uchrashmaganini va muloqot qilmaganini ta’kidladi.
“Bu holat meni chuqur xavotirga solmoqda”, — dedi xonanda.
