Vulture jurnali Gollivudning eng nufuzli 100 nafar rejissyor reytingini e’lon qildi. Roʻyxatning birinchi pogʻonasini britaniyalik rejissyor Kristofer Nolan egalladi.
Nashr jurnalistlari Nolanni “obroʻ-e’tibor, ommaviy mashhurlik, intellektual mahorat va global ta’sirni oʻzida mujassam etgan kinoijodkor” sifatida ta’riflagan. Reytingda ikkinchi oʻrin “Gunohkorlar” filmi rejissyori Rayan Kuglerga nasib etdi. Vulture uni bugungi Amerika kino sanoatidagi eng talabgir mualliflardan biri sifatida e’tirof etgan. Uchinchi oʻrinni esa “Dyuna” filmlari rejissyori Deni Vilnyov egalladi.
Nashr qayd etishicha, zamonaviy kino sanoatida ta’sir faqat katta byudjetli blokbasterlar yaratuvchilari bilan cheklanmaydi. Mualliflik kinosi va festival filmlari rejissyorlari ham soha rivojiga sezilarli hissa qoʻshmoqda. Shu bois Pol Tomas Anderson kuchli oʻntalikdan joy oldi.
Shuningdek, Greta Gervig eng nufuzli oʻnta rejissyor orasidagi yagona ayol boʻldi. U reytingda toʻrtinchi oʻrinni egallab, Kventin Tarantino, Jeyms Kemeron, Stiven Spilberg, Martin Skorseze va Jordan Pil kabi mashhur kinoijodkorlarni ortda qoldirdi.
