Amerika kinoakademiyasi 99-marotaba topshiriladigan Academy Awards uchun yangi qoidalarni e’lon qildi. Bu o‘zgarishlar orasida bir nechta muhim yangiliklar bor.
Birinchidan, endi aktyorlar bitta kategoriyada bir nechta nominatsiyaga ega bo‘lishi mumkin. Masalan, agar ularning ikki xil roli ham eng yaxshi 5 talikka kirsa, ikkalasi ham hisobga olinadi. Avvallari esa faqat bitta roli tanlab olinardi. Yana bir muhim o‘zgarish sun’iy intellekt bilan bog‘liq. Endi aktyorlik nominatsiyalarida faqat inson tomonidan ijro etilgan rollar ko‘rib chiqiladi. Shuningdek, ssenariylar ham inson tomonidan yozilgan bo‘lishi shart. Shu bilan birga, Akademiya filmda generativ sun’iy intellekt qanday ishlatilganini aniqlash uchun qo‘shimcha ma’lumot talab qilish huquqini saqlab qoladi.
O‘zgarishlar “Eng yaxshi xalqaro film” kategoriyasiga ham ta’sir qildi. Endi film ikki xil yo‘l bilan nomzod bo‘lishi mumkin. Avvalgidek davlat yoki hudud tomonidan tavsiya etilishi orqali yoki yirik kinofestivallarda g‘olib bo‘lish orqali. Masalan, Kann kinofestivali, Venetsiya kinofestivali, Berlin xalqaro kinofestivali, Toronto xaqaro kinofestivali, “Sandens” kinofestivali, Pusan xalqaro kinofestivali kabi nufuzli festivallarda.
Eslatib o‘tamiz, “Oskar – 2027” mukofoti 2026-yil 1-yanvardan 31-dekabrgacha kinoteatrlarda namoyish etilgan filmlarni qamrab oladi. Taqdirlash marosimi esa 2027-yil 14-mart kuni bo‘lib o‘tadi.
