Amerikalik xonanda Ariana Grande shaxsiy ma’lumotlari va hali e’lon qilinmagan ijodiy materiallarini o‘g‘irlagan xakerlarga qarshi sudga murojaat qildi. Bu haqda People nashri xabar berdi.
Sud hujjatlariga ko‘ra, noma’lum shaxslar xonanda bilan ishlagan fotograf va prodyuserlarning shaxsiy akkauntlarini buzib, Ariana Grandening hali chiqarilmagan qo‘shiqlari, suratlari hamda audio va videolarini qo‘lga kiritgan. Keyinchalik ular ushbu materiallarni sotish orqali daromad olgan.
Da’voda aytilishicha, faqat 2023-yilning o‘zida xonandaning 45 ta hali chiqarilmagan qo‘shig‘i internetga sizdirilgan. 2011-yildagi musiqiy faoliyati boshlanganidan buyon esa bunday holatlar yuzlab marta takrorlangan.
Ariana Grande jamoasi sud orqali nafaqat xakerlarning shaxsini aniqlash, balki kelajakda bunday noqonuniy holatlarning oldini olishni ham maqsad qilgan. Ularning ta’kidlashicha, san’atkorlar o‘z ijod mahsulotlarini qachon va qanday taqdim etishni o‘zlari hal qilish huquqiga ega.
