Ayrim foydalanuvchilar aktrisani botoksni haddan tashqari ko‘p ishlatganlikda ayblashmoqda. Tomoshabinlarning fikricha, botoks Ennning mimikasi va aktyorlik o‘yiniga salbiy ta’sir qilgan. Bundan tashqari, ular aktrisaning juda silliqlashgan yuzi sabab film voqealari qadimgi Gretsiyada bo‘layotganiga ishonish qiyinligini aytishmoqda. Foydalanuvchilar “Sevgi va boshqa narsalar” filmidagi Enn Xeteuey obrazini “Odissey”dagi ko‘rinishi bilan solishtirishgan. Ikki kadrni taqqoslagan muxlislar aktrisa kosmetologik muolajalarda “me’yoridan oshib ketgan” degan xulosaga kelishgan.
Biroq, hamma ham bu tanqidga qo‘shilmadi. Ko‘pchilik aktrisani himoya qilib, ayol aktyorlarning tashqi ko‘rinishi ko‘pincha rollaridan ham ko‘proq muhokama qilinishini ta’kidladi. Shuningdek, “Sevgi va boshqa narsalar” filmi chiqqaniga 16 yil bo‘lganini eslatib, vaqt o‘tishi bilan inson qiyofasi tabiiy ravishda o‘zgarishini aytishmoqda.
Eslatib o‘tamiz, Kristofer Nolanning yangi filmida Enn Xeteuey Penelopu rolini ijro etadi. Odissey obrazini esa Mett Deymon gavdalantirgan. Film allaqachon yilning eng kutilayotgan loyihalaridan biriga aylangan.
