Ledi Gaga muxlislari uchun yangi loyiha tayyorlamoqda. Xonanda o‘zining Los-Anjelesdagi yopiq konserti asosida suratga olingan konsert filmi va live-albom chiqarishini rasman e’lon qildi. Loyiha “Mayhem Ball” shousi asosida yaratilgan bo‘lib, u “Mayhem” albomining yangi musiqiy talqini hisoblanadi. Eksklyuziv konsert shu yilning 14-yanvar kuni Los Angelesdagi teatrlardan birida bo‘lib o‘tgan. Tadbirga taxminan 2300 muxlis tashrif buyurgan va eng qiziq tomoni konsert davomida telefonlardan foydalanishga ruxsat berilmagan. Tomoshabinlar esa lotereya orqali tanlab olingan. Konsert dasturidan xonandaning “Disease”, “Abracadabra”, “Garden of Eden”, “Perfect Celebrity” va “Die With a Smile” kabi mashhur qo‘shiqlari o‘rin olgan. Film va live-albom premyerasi 15-may kuni o‘tkizilishi rejalashtirilgan.
Ma’lumot uchun, “Mayhem Ball” Ledi Gaganing 2022-yildan beri ilk yirik konsert safari hisoblanadi. Dastlab, loyiha kichikroq formatda rejalashtirilgan bo‘lsa-da, albomning katta muvaffaqiyati va muxlislar talabining oshishi sabab shou yanada kengaytirilgan. Ko‘plab muxlislar “Mayhem” albomini xonandaning eski uslubiga qaytishi sifatida baholamoqda. Albom qisqa vaqt ichida striming platformalari va savdo reytinglarida yuqori natijalarni qayd etgan.
