Gollivud aktyori va Kaliforniya shtatining sobiq gubernatori Arnold Shvartsenegger Shimoliy Irlandiyadagi Olster universiteti tomonidan faxriy doktorlik unvoni bilan taqdirlandi.
Marosim universitetning Belfast kampusida bo‘lib o‘tdi. Faxriy daraja unga jamiyatga qo‘shgan hissasi, atrof-muhitni himoya qilish va san’atdagi xizmatlari uchun topshirildi. Shvartsenegger bunday e’tirof har doim yoqimli ekanini, ayniqsa bajarilgan ishlar uchun berilganda yanada qadrli ekanini ta’kidladi.
“Bu men uchun juda muhim, chunki rektor aytganidek, men 60 yil oldin ilk bor Belfastga kelganman — o‘ylab ko‘ring, bundan 60 yil oldin. Bu yerda o‘tirganlarning ko‘pchiligi o‘sha paytda hali tug‘ilmagan ham edi. Men uchun bu haqiqiy yubiley — 60 yil o‘tib yana bu yerga qaytish. Va men o‘shanda aytgandim: I’ll be back”, — dedi Kaliforniyaning sobiq gubernatori.
Talabalar Gollivud yulduzini qarsaklar va “U qaytdi” hamda “Hasta la vista” kabi “Terminator” filmidagi mashhur iboralarni eslatuvchi plakatlar bilan kutib olishdi.
Bu Shvartseneggerning Shimoliy Irlandiyaga 60 yil ichidagi ilk tashrifi bo‘ldi. U 1966-yilda bodibilding tadbiri uchun kelgan va aynan o‘sha safarda ilk bor omma oldida nutq so‘zlaganini aytgan.
