Donald Tramp “Melaniya”dan 10,7 mln dollar oldi
AQSh prezidenti Donald Tramp 2025-yilgi moliyaviy deklaratsiyasiga ko‘ra, “Melaniya” nomli hujjatli film uchun 10,7 million dollar miqdorida litsenziya to‘lovini olgan. Bu haqda Variety nashri xabar berdi.
Nashr ma’lumotiga ko‘ra, Amazon MGM Studios film huquqlarini 40 million dollarga sotib olgan va uni targ‘ib qilish uchun yana 35 million dollar sarflagan. Film jahon prokatida atigi 16,6 million dollar yig‘gan, shundan so‘ng Prime Video striming platformasida namoyish etila boshlagan. Filmni Truth Social orqali Donald Trampning o‘zi ham faol targ‘ib qilib, “Albatta, ko‘rish kerak” mazmunidagi postlar ham yozgan.
Moliyaviy deklaratsiyaga ko‘ra, Tramp birinchi xonim Melaniya Trampning memuarlari litsenziyasi uchun yana 521 ming dollar daromad olgan. Melaniya bilan bog‘liq NFT va boshqa raqamli kolleksiya mahsulotlari esa unga qariyb 6 million dollar keltirgan.
Hisobotga ko‘ra, Trampning 2025-yildagi umumiy daromadi 2,2 milliard dollardan oshgan. Uning qariyb 1,4 milliard dollari Tramp oilasining kriptovalyuta loyihalari hisobiga to‘g‘ri kelgan.
Eslatib o‘tamiz, “Melaniya” hujjatli filmi joriy yilning 30-yanvaridan kinoteatrlarda namoyish etila boshlagan. 104 daqiqa davom etadigan kartinada Donald Trampning 2025-yildagi ikkinchi inauguratsiyasi arafasidagi 20 kunlik davr yoritilgan.
