Timoti Shalame va Selena Gomes “Nyu-Yorkda yomg‘irli kun” filmi chiqqanidan yetti yil o‘tib, yana bir loyihada birga ishtirok etadi, deb yozmoqda Deadline. Ammo bu safar biroz boshqacharoq formatda.
Yulduzlar “Yolg‘iz emas” nomli yangi animatsion filmning bosh qahramonlariga ovoz beradi. Syujet markazida introvert mexanik Jo va o‘simlik yoqilg‘isida ishlaydigan dunyodagi birinchi raketani yaratgan iqtidorli astrobotanik Fren bo‘ladi. Qahramonlar raketa uchirilishi oldidan birlashadi, ammo ularning rejalarini uyiga qaytishga urinayotgan uch nafar begona sayyoralik buzib qo‘yadi.
Qayd etish joiz, bu ish Shalame uchun to‘liq metrajli animatsiyadagi debyut bo‘ladi. Gomes esa multfilm qahramonlariga ovoz berish borasida tajribali — tomoshabinlar uni “Monstrlar ta’tilda” franshizasidagi Mevis obrazi orqali yaxshi taniydi. Shuningdek, aktyorlar avval ham birga ishlagan — ular romantik komediya janridagi “Nyu-Yorkda yomg‘irli kun” filmida suratga tushishgan.
Kartinaning rejissyori Erik Giyon bo‘lib, u “Jirkanch kamina” franshizasi multfilmlari ustida ham ishlagan. “Yolg‘iz emas” filmining premyerasi 2027-yil 16-aprel kuniga belgilangan.
