Dunyoga mashhur amerikalik YouTube blogeri MrBeast — Jimmi Donaldson O‘zbekistonga keladi. U O‘zbekiston Madaniyat va san’atni rivojlantirish jamg‘armasi taklifiga binoan 9-oktabr kuni Toshkentda jamoatchilik dasturida ishtirok etadi. Bu blogerning Markaziy Osiyoga ilk tashrifi bo‘lishi kutilmoqda.
Tadbirda ishtirok etish bepul, biroq joylar cheklangan. 18 yoshdan katta va tadbir kuni Toshkentda shaxsan qatnasha oladiganlar ro‘yxatdan o‘tishi mumkin. Barcha talabga javob beradigan ishtirokchilar kompyuter orqali tasodifiy saralash asosida tanlanadi.
Ro‘yxatdan o‘tish 6-oktabr soat 12:00 dan 8-oktabr soat 12:00 gacha davom etadi. Har bir ishtirokchi faqat bir marta, o‘zining tasdiqlangan telefon raqami va amaldagi pasporti yoki ID-kartasi orqali ariza topshirishi mumkin. Tanlangan ishtirokchilar bilan ro‘yxatdan o‘tishda ko‘rsatilgan aloqa ma’lumotlari orqali bog‘laniladi.
Uchrashuv interaktiv formatda tashkil etilib, unda turli o‘yinlar va MrBeast faoliyati hamda kam tanilgan faktlarga oid viktorinalar o‘tkazilishi, g‘oliblarga esa qimmatbaho sovrinlar topshirilishi rejalashtirilgan. Ayrim manbalarga ko‘ra, tadbirda 200 nafar muxlis ishtirok etishi ko‘zda tutilgan.
Hozircha tadbirning aniq manzili va vaqti ochiq e’lon qilinmagan. Tanlangan ishtirokchilarga bu ma’lumotlar alohida yuboriladi. Tashkilotchilar ro‘yxatdan o‘tish faqat rasmiy manbalar orqali amalga oshirilishini, buning uchun to‘lov, bank karta ma’lumotlari yoki akkaunt paroli talab qilinmasligini ta’kidlagan.
MrBeast o‘zining katta byudjetli videolari, ekstremal chellenjlari va yirik sovrinlari bilan tanilgan. Uning YouTube kanallariga 500 milliondan ortiq obunachi yig‘ilgan bo‘lib, u dunyodagi eng yirik kontent yaratuvchilardan biri hisoblanadi.
