O‘zbekiston davlat san’at va madaniyat instituti “Kino va televideniye rejissyorligi” yo‘nalishi 2-bosqich talabasi Axadjon Oxunov tomonidan suratga olingan “Erta ungan lola” qisqa metrajli badiiy filmi III Xalqaro “Yevrosiyo Kinofest” festivalida ishtirok etib, nufuzli nominatsiyalardan birini qo’lga kiritdi.
Har yili Rossiyaning Sochi shahrida o‘tkaziladigan mazkur festival Yevrosiyo mintaqasidagi eng yirik kino anjumanlaridan biri hisoblanadi. Unda turli mamlakatlardan, asosan Yevrosiyo davlatlaridan kinoijodkorlar o‘z asarlari bilan qatnashadilar. Bu yil festival 13–19-iyun kunlari o‘tkazildi va unda dunyoning 53 ta davlatidan vakillar ishtirok etdi.
Festival dasturi qisqa metrajli filmlar, hujjatli filmlar va to‘liq metrajli filmlar yo‘nalishlarini qamrab oldi. O‘zbekistondan to‘liq metrajli filmlar tanlovida rejissyor Rashid Malikovning “Paxta” filmi ishtirok etib, “Eng yaxshi ssenariy” nominatsiyasi g‘olibi bo‘ldi.
Qisqa metrajli filmlar tanlovida esa O‘zbekistondan beshta film — “Qadam. Quyosh bolasi Yusuf”, “Zarra”, “Qaychi”, “Mehr” hamda Axadjon Oxunovning “Erta ungan lola” filmlari qatnashdi. Umumiy hisobda ushbu yo‘nalishda 30 dan ortiq film namoyish etildi. Tanlov yakunlariga ko‘ra, turli nominatsiyalar bo‘yicha 6 ta film taqdirlandi. “Erta ungan lola” filmi “Eng yaxshi rus tilidagi xorijiy film” nominatsiyasini qo‘lga kiritdi.
Ikkinchi jahon urushi voqealari fonida suratga olingan film Kursk yaqinidagi o‘rmonlarda qurshovda qolgan o‘zbek razvedkachisi serjant Qobil va yetim qiz Galinaning taqdirini hikoya qiladi. Asarda qor orasida erta ochilgan lola timsoli hayotga intilish va inson qalbidagi so‘nmas umid ramzi sifatida namoyon bo‘ladi.
