Bred Pittning vinochilik biznesi bo‘yicha Anjelina Joli bilan sud ishida aktyor kichik g‘alabaga erishdi. Bu haqda People nashri xabar berdi.
Kaliforniya sudi Bred Pittning talabini ma’qulladi. Unga ko‘ra, vino zavodi ulushining sotilishida qatnashgan shaxslar rasmiy ravishda so‘roq qilinadi. Endilikda Stoli va Tenute del Mondo kompaniyalari vakillari ham Londonda ko‘rsatma berishga chaqiriladi.
Eslatib o‘tamiz, sobiq er-xotin o‘rtasidagi mojaro 2021-yilda Joli vinochilik biznesidagi o‘z ulushini sotganidan so‘ng boshlangan edi. Pittning fikricha, Joli avvalgi kelishuvni buzgan va uning roziligisiz o‘z ulushini sotmasligi kerak edi. Joli esa bunday kelishuvning mavjud bo‘lganini rad etmoqda. Shuningdek, aktrisa Bred Pitt istamagan tomon bilan bitim imzolagan.
Anjelina Joli va Bred Pitt 2016-yilda, 12 yillik munosabatlardan so‘ng ajrashgan. Ularning ajrashish jarayoni faqat 2024-yil dekabr oyida yakunlangan. Sobiq juftlik olti nafar farzandni tarbiyalab kelmoqda.
