“Sokin hudud” filmi franshizasining uchinchi qismi ustida rasmiy ravishda ish boshlandi. Film rejissyori Jon Krasinski o‘z sahifasida suratga olish jarayoni boshlanganini tasdiqlovchi fotoni e’lon qildi. Unda “Part 3” yozuvi tushirilgan kinoxlopushka aks etgan.
Eslatib o‘tamiz, Krasinski nafaqat rejissyor, balki dastlabki ikki filmda ham asosiy rollardan birini ijro etgan ijodkor sifatida tanilgan.
Hozircha yangi film syujeti haqida batafsil ma’lumot berilmagan. Biroq aktyorlar tarkibi allaqachon ma’lum qilingan. Emili Blant, Killian Merfi, Millisent Simmonds, Noa Jup, Jek O’Konnell, Jeyson Klark va Keti M. O’Bayn kabi mashhur aktyorlar ishtirok etadi.
Ma’lumot uchun, “Sokin hudud” filmi so‘nggi yillardagi eng muvaffaqiyatli loyihalardan biri hisoblanadi. Birinchi film 2018-yilda chiqqan bo‘lib o‘zining noodatiy konsepsiyasi bilan katta shuhrat qozongan.
Uchinchi qism premyerasi 2027-yil 30-iyulga rejalashtirilgan.
