Besh karra “Oskar” mukofotiga nomzod bo‘lgan rejissyor Jeyms Mangold o‘zining 1997-yildagi “Politsiyachilar” filmi asosida serial suratga oladi. Bu haqda Deadline xabar berdi.
Mangold loyihada nafaqat rejissyor, balki ssenariy hammuallifi va ijrochi prodyuser sifatida ham ishtirok etadi. So‘nggi ikki vazifani u Robert Livayn bilan bo‘lishadi. Livayn shuningdek loyiha shouranneri ham bo‘ladi. Serialni Paramount Television Studios va Miramax Television ishlab chiqarmoqda.
Loyiha g‘oyasi bundan ikki yil oldin paydo bo‘lgan. O‘shanda rejissyor Miramax rahbari Jonatan Glikman bilan studiya kutubxonasidagi filmlardan birini televideniyega moslashtirish imkoniyatini muhokama qilgan edi. Mangold o‘tgan yil sentabrida Paramount Pictures bilan shartnoma imzolaganidan keyin bu muzokaralar davom etgan.
Asl “Politsiyachilar” filmi 1997-yilda ekranlarga chiqqan. Bosh rolni Silvestr Stallone ijro etgan. U Nyu-Jersidagi kichik shaharcha sherifi rolini o‘ynagan va Nyu-Yorkdan kelgan korrupsiyalashgan politsiyachilar bilan to‘qnash keladi.
Filmda, shuningdek, Xarvi Keytel, Rey Liotta, Robert De Niro, Peter Berg, Janin Garofalo va Maykl Repaport ham suratga tushgan.
