Mashhur xonanda Shakira turmush o‘rtog‘i Jerar Pike bilan ajralganidan keyingi hayoti haqida The times nashriga bergan intervyusida so‘zlab berdi.
Xonanda intervyuda oilasining buzilishi uning hayotidagi eng qiyin bosqichlardan biri bo‘lgani va uni asrab qolishga ko‘p uringanini yashirmadi. “Men doimiy saqlab qolishga urindim, ammo orzu qilgan oilam qanday buzilganini ko‘rdim”, – deydi u. Shakira bu holat uni ruhan ezganini va hayotga boshqacha nazar bilan qarashga o‘rgatganini ham ta’kidladi.
Qiyin davrda xonandani do‘stlari Kris Martin va Adel qo‘llab-quvvatlagan. Hatto Kris Martin unga sinib, oltin bilan tiklangan vaza tasvirini yuborgan. Bu ramz inson sinovlardan o‘tib yanada mustahkam bo‘lishini anglatadi.
Hozirda Shakira asosiy e’tiborini farzandlari va ijodiga qaratganini, yangi munosabatlar uchun hozircha vaqti yo‘qligini ham aytib o‘tgan.
Eslatib o‘tamiz, Shakira va Jerar Pike 2022-yilda 11 yillik munosabatlardan so‘ng ajrashgan. Ularning ikki nafar o‘g‘li bor.
