Kris Evans yangi “Mening aziz Kaliforniyam” nomli kriminal triller aktyorlar tarkibiga rasman qo‘shildi. Bu haqda Deadline xabar berdi.
Aktyor loyihada Josh Brolin o‘rnini egallaydi. Brolin band jadvali sabab filmda ishtirok eta olmay qolgan. Film rejissyori – Elayji Baynum. Syujet 1980-yillarda Los-Anjelesda kechadi va bitta jinoyat atrofida turli insonlar taqdirlari qanday bog‘lanib ketishini hikoya qiladi.
Filmda teleboshlovchi va uning betoqat rafiqasi, kantri qo‘shiqchisi, ikki mayda jinoyatchi va sobiq mahbus ishtirok etadi. Ularning barchasi yaxshiroq hayot orzusida yashaydi, ammo, bitta voqea hammasini o‘zgartirib yuboradi.
Filmda Evans bilan birga yana bir qancha yulduzlar ham qatnashadi: Jessika Chesteyn, Kris Payn, Mayki Medison, Don Chidl va Charlz Melton. Suratga olish ishlari yoz oxirida boshlanishi rejalashtirilgan.
