Netflix’ning “K-pop jin ovchilari” animatsion filmi “Oskar” taqdirlash marosimida muhim yutuqqa erishib, “Eng yaxshi animatsion film” hamda “Eng yaxshi original qo‘shiq” (“Golden”) nominatsiyalarida g‘olib bo‘ldi. Biroq film jamoasi uchun bu yutuq to‘liq bayramga aylanmadi — marosim davomida yuzaga kelgan ikki vaziyat keng muhokamalarga sabab bo‘ldi.
Birinchi mojaro rejissyor Meggi Kangning sahnadagi nutqi bilan bog‘liq bo‘ldi. U o‘z chiqishida bu g‘alaba koreys madaniyati uchun muhim ekanini ta’kidlab, koreyslar nihoyat o‘zlarini shunday filmda ko‘rayotganini aytdi. Uning so‘zlari ilhomlantiruvchi ruhda bo‘lsa-da, ijtimoiy tarmoqlarda turlicha qabul qilindi.
Ko‘plab foydalanuvchilar bu fikrga qarshi chiqib, koreys kinosi allaqachon xalqaro maydonda katta muvaffaqiyatlarga erishganini eslatishdi. Xususan, “Parazit” filmi 2019-yilda “Eng yaxshi film” mukofotini qo‘lga kiritgani misol sifatida keltirildi. Ayrimlar esa bu bayonot koreys kino sanoatining avvalgi yutuqlarini yetarlicha e’tirof etmagandek tuyulganini ta’kidlashdi.
Kechadagi ikkinchi bahsli vaziyat “Golden” qo‘shig‘i mualliflarining chiqishi paytida yuz berdi. Ijrochi EJAE nutqni boshlab bergach, qo‘shiq muallifi Li Yo Han minnatdorchilik so‘zlarini o‘qishni boshladi. Ammo aynan shu paytda orkestr musiqa chalishni boshladi — bu chiqish uchun ajratilgan vaqt tugaganini bildirardi. Natijada ularning nutqi yakunlanmasdan to‘xtatildi.
Ushbu holat nafaqat ijtimoiy tarmoqlarda, balki marosim zalida ham norozilik uyg‘otdi. Ko‘pchilik bu vaziyatni san’atkorlarga nisbatan hurmatsizlik sifatida baholadi, ayniqsa k-pop uchun bu tarixiy lahzalardan biri ekanini inobatga olganda.
Keyinchalik matbuot anjumanida ijodkorlar bu noqulay vaziyatga yengil munosabat bildirishdi. Li Yo Han sahnada aytishga ulgurmagan minnatdorchiliklarini yakunlab, jamoasi, oilasi va hamkorlariga rahmat aytdi.
Shu tariqa, “K-pop jin ovchilari”ning “Oskar”dagi muvaffaqiyati katta yutuq sifatida qayd etilgan bo‘lsa-da, marosimdagi bahsli holatlar uning atrofida keng muhokamalarni keltirib chiqardi.
