Amerikalik aktyor, rejissyor va prodyuser Jorj Kluni Venetsiya kinofestivalining umrboqiy ijod uchun beriladigan “Oltin sher” mukofotiga sazovor bo‘ldi. Aktyor ushbu e’tirofga kino va televideniyedagi aktyorlik, rejissyorlik hamda prodyuserlik faoliyati, shuningdek, qariyb yigirma yildan buyon olib borayotgan insonparvarlik ishlari uchun munosib deb topildi.
Festivalning badiiy rahbari Alberto Barbera Klunini “har tomonlama yetuk va xarizmatik ijodkor” deya ta’riflab, uning faoliyati tijoriy muvaffaqiyat bilan bir qatorda yuksak badiiy filmlar yaratish va muhim ijtimoiy mavzularni yoritishga qaratilgani bilan ajralib turishini ta’kidladi. Jorj Kluni Venetsiya kinofestivalining doimiy ishtirokchilaridan biri hisoblanadi. Uning “Xayrli tun va omad tilayman” (Good Night, and Good Luck), “Tebranish” (Gravity) va “Jey Kelli” filmlarining premyeralari aynan ushbu festivalda bo‘lib o‘tgan.
Eslatib o‘tamiz, Kluni faoliyati davomida ikki karra “Oskar”, to‘rtta “Oltin Globus”, to‘rtta Amerika kino aktyorlar gildiyasi mukofotlari, BAFTA va “Emmi” singari qator mukofotlarni qo‘lga kiritgan.
