“BTS” guruhi a’zolari — RM, Jin, Shuga, Jey Houp, Jimin, V va Chonguk Mexikodagi konsertlari oldidan Klaudiya Sheynbaum bilan uchrashuv o‘tkazdi.
Muzokaralardan so‘ng Meksika prezidenti san’atkorlar bilan tushgan suratni ijtimoiy tarmoqlarda e’lon qildi. U “BTS” ijodida “do‘stlik, tinchlik va muhabbat g‘oyalari mujassam” ekanini ta’kidladi.
“Men Meksika yoshlari orasida eng sevimli guruhlardan biri bo‘lgan BTS’ni mamnuniyat bilan qarshi olaman. Musiqa va qadriyatlar Meksika hamda Janubiy Koreyani birlashtiradi”, — deb yozdi Sheynbaum.
Shuningdek, “BTS” a’zolari prezident bilan birga Sokalo maydoniga yig‘ilgan 50 mingdan ortiq muxlisni Milliy saroy balkonidan qutladi. Guruh a’zolari muxlislarga qo‘l silkitib, ularni telefonlariga tasvirga oldi. Jamoa yetakchisi RM esa yig‘ilganlar qarshisida qisqa nutq so‘zlab, olqishlarga sazovor bo‘ldi.
Ma’lum qilinishicha, shu yil yanvar oyida Sheinbaum BTS’ning yirik “ARIRANG” turi doirasida qo‘shimcha konsertlar tashkil etishni so‘rab murojaat qilgan ilk jahon yetakchilaridan biri bo‘lgan. U bu boradagi maktubni Koreya Respublikasi prezidenti Li Chje Myonga yuborgan va so‘rov ijobiy qabul qilingan.
BTS konsertlari 7-9-10-may kunlari Mexikodagi “Estadio GNP Seguros” stadionida bo‘lib o‘tadi.
Avvalroq guruh a’zolari Amerikaning Rolling Stone jurnalining may soni qahramoniga aylangani haqida ham xabar berilgandi. Intervyu davomida ular beshinchi studiyaviy “ARIRANG” albomiga kiritilmagan qo‘shiqlar taqdiri haqida ham gapirib o‘tgan.
