Kiberxavfsizlik mutaxassisi Jeremi Faulerning ma’lum qilishicha, Gollivudning bir qator mashhur yulduzlariga tegishli telefon raqamlari va elektron pochta manzillari internetga sizib chiqqan. Jabrlanganlar orasida Anjelina Joli, Robert De Niro, Sheron Stoun, Jorj Lukas, Maykl Duglas, Rami Malek, Martin Skorseze va boshqa taniqli shaxslar bor.
Mutaxassisning aytishicha, ushbu ma’lumotlar “Tribeca” kinofestivaliga oid 666 mingdan ortiq yozuvlar orasidan aniqlangan. Bazada nafaqat aloqa ma’lumotlari, balki ayrim qurilmalar haqida, jumladan iPhone modeli va Safari brauzeridan foydalanish holati kabi texnik ma’lumotlar ham bo‘lgan.
Faulerning ta’kidlashicha, sizib chiqqan ma’lumotlarning katta qismi yulduzlarning o‘ziga emas, balki ularning menejerlari va agentlariga tegishli. Hozirda festival vakillari hodisa yuzasidan tergov olib bormoqda, mashhurlar esa hozircha izoh bergani yo‘q.
