1-sentabr kuni ko‘hna Samarqandning Registon maydonida dunyoga mashhur opera yulduzi Andrea Bochellining konsert dasturi o‘tkazilishi kutilmoqda. Ko‘pchilik uni “Time to say God bye”, Besame mucho” qo‘shiqlari orqali yaxshi taniydi. Zamonamizning batakror tenor ovoz sohibi ilk bor dunyoning eng go‘zal sahnalaridan birida chiqish qiladi.
Ushbu kechada Bochelli, maxsus mehmon — Aida Garifullina, O‘zbekiston Milliy simfonik orkestri va xor jamoalari ijrosida jahon mumtoz musiqasining eng sara asarlari va mashhur qo‘shiqlari yangraydi.
Bochelli afsonaviy opera kuychisi Luchano Pavorottining shogirdi bo‘lib, bolaligiga ko‘zi ojiz bo‘lib qolgan. Lekin u dunyoni o‘z qo‘shiqlari orqali yanada go‘zal tarzda ko‘ra oladi. Ushbu konsert Madaniyat va san’atni rivojlantirish jamg‘armasi hamkorligida tashkillashtirolmoqda.
Ma’lumot o‘rnida, Andrea Bochelli 1958-yil 22-sentabrda Italiyadagi kichik bir shaharcha – Lajatikoda tug‘ilgan. Andrea 6 yoshidayoq pianino chalishni o‘rgangan. Keyinchalik u gitara, fleyta, saksofon, truba va barabanda ham o‘zini sinab ko‘rgan. 12 yoshida futbol o‘ynayotib, boshidan olgan jarohat natijasida Andrea butunlay ko‘r bo‘lib qoladi. Bu holat har qanday odamni ruhdan tushirishi mumkin edi. Ammo Bochelli san’atga bo‘lgan cheksiz mehri sabab tinimsiz harakat qildi.
Bochelli Rim Kolizeyida yakkaxon kontsert bergan birinchi klassik qo‘shiqchi bo‘ldi. U Olimpiya o‘yinlaridan tortib, qirollik marosimlari, Vatikandagi konsertlargacha ko‘plab muhim sahnalarda chiqish qilgan. U 90 milliondan ortiq albom sotib, musiqa tarixidagi eng muvaffaqiyatli tenor sifatida e’tirof etilgan.
