Alla Pugachovaning Solnechnogorskdagi hashamatli hovlisi xavf ostida. Shuningdek, xonandaning Istra suv ombori bo‘yidagi shaxsiy qayiqlar to‘xtash joyi olib qo‘yilgan.
Pugachova 1990-yillarning oxirida 1700 kvadrat metrli yer uchastkasini sotib olgan. Bu yerda maydoni 760 kvadrat metr bo‘lgan uch qavatli dala hovli joylashgan. Qarorgohda 6 ta yotoqxona, basseyn, lift, bilyard xonasi, kinoteatr va vino yerto‘lasi bor. Bundan tashqari, ushbu hududda barbekyu zonasi, bolalar maydonchasi hamda xodimlar va qo‘riqchilar uchun alohida yozgi uy ham mavjud.
Sohil hududi atrofida uzoq vaqt davomida bahslar bo‘lgan. Jamoatchilik vakillari suv havzasi va sohilbo‘yi hududi yagona tabiiy majmua hamda umumiy foydalanishdagi obyekt ekanini aniqlagan.
Qonunga ko‘ra, Pugachova sohil hududida bunday inshoot qurish huquqiga ega bo‘lmagan. Shu sababli uning qayiqlar to‘xtash joyi olib qo‘yilgan. Endi ayrim inshootlar davlatga tegishli yerda joylashgani sababli xonanda qarorgohidan ham ayrilishi mumkin.
