Xonanda Hilola Hamidova so‘nggi paytlarda nega ijodda kamnamo boʻlib qolganiga izoh berdi. Uning aytishicha, hozir u ko‘proq oilasi, farzandi va sog‘ligiga vaqt ajratishni afzal ko‘rmoqda. Bu haqda xonanda “Navo” telekanalining “Mening oshxonam” ko‘rsatuviga bergan intervyusida aytib oʻtgan.
San’atkor o‘zini ijodda biroz dangasa deb hisoblashini, biroq hayotda aksincha, ishga haddan tashqari berilib ketadigan inson ekanini ta’kidladi. Shu sababli u o‘tgan yildan boshlab dam olish va o‘ziga e’tibor qaratishga qaror qilgan.
Hilola Hamidova san’atni butunlay tark etmaganini, ammo hozircha uzoq safarlar va doimiy ijodiy faoliyatdan tanaffus olayotganini aytdi. Xonandaning so‘zlariga ko‘ra, yaxshi qo‘shiqlar paydo bo‘lsa, ularni albatta ijro etadi.
Shuningdek, u sun’iy intellekt yordamida klip suratga olish taklifini rad etganini ma’lum qildi.
Hilola Hamidova baxt haqida so‘z yuritarkan, uni oddiy hayotiy lahzalarda, yaqinlar salomatligi va oilaviy xotirjamlikda ko‘rishini ta’kidlagan.
