“Sumerki” yulduzi Kristen Styuart yana vampirlar mavzusidagi filmda suratga tushadi. Bu haqda Deadline xabar berdi.
Gap mistik triller janridagi “Flesh of the Gods” filmi haqida ketmoqda. Filmni suratga olish ishlari allaqachon Ispaniyada boshlangan. Loyiha ikki bosqichda amalga oshiriladi: dastlabki suratga olish ishlari Kanar orollarida, keyingi qismi esa Kyolnda davom etadi.
Kartinada Kristen Styuart bilan birga Vagner Moura ham bosh rollardan birini ijro etadi. Shuningdek, filmda Elizabet Olsen qatnashishi kutilmoqda.
Voqealar 1980-yillardagi Los-Anjelesda kechadi. Raul va Aleks ismli turmush qurgan juftlik shaharning xavfli tungi hayotiga sho‘ng‘ib, sirli ayol va uning atrofiga yig‘ilgan odamlar bilan tanishadi. Shundan so‘ng ular zo‘ravonlik va gedonizmga boy g‘ayritabiiy dunyo ichiga kirib qoladi.
