Turk kino va seriallari orqali keng tanilgan aktyor Mert Ramazan Demir yangi loyihasi uchun keskin o‘zgarishga qo‘l urdi. U “Delikanlı” nomli serialdagi roli uchun 20 kilogramm vazn tashlaganini ma’lum qildi. Mazkur serial Show TV ekranlarida namoyish etilishi rejalashtirilgan bo‘lib, unda Demir bosh rolni ijro etadi. Aktyorning yangi obrazi esa allaqachon jamoatchilik orasida katta qiziqish uyg‘otmoqda.
Yaqinda Nishantashi hududida jurnalistlar nigohiga tushgan aktyor o‘zining keskin ozganini yashirmadi. U ommaviy axborot vositalari bilan suhbatda:
“Juda ozdim, aniq 20 kilogramm vazn tashladim. Hozir sport bilan muntazam shug‘ullanyapman va ovqatlanishimga jiddiy e’tibor beryapman”, — dedi.
Aktyorning yangi ko‘rinishi muxlislar orasida turlicha fikrlarni keltirib chiqardi. Ayrimlar uning fidoyiligini yuqori baholagan bo‘lsa, boshqalar bunday tez ozish sog‘liq uchun xavfli bo‘lishi mumkinligini ta’kidlamoqda.
Shunga qaramay, Mert Ramazan Demirning yangi roli va “Delikanlı” seriali allaqachon mavsumning eng kutilayotgan loyihalaridan biriga aylanib ulgurdi.
