Mashhur fantastik franshiza — “Dyuna”ning uchinchi qismi suratga olish ishlari nihoyasiga yetdi. Rejissyor Deni Vilnyov boshchiligidagi jarayon to‘rt oy davom etdi. Filmning premyerasi 2026-yil 18-dekabr sanasiga rejalashtirilgan.
Syujetga ko‘ra, Atreydeslar uyi vorisi Pol (Timoti Shalame) va uning onasi yana Arrakis sayyorasidagi xavf-xatarlar bilan to‘qnash keladi — bu sayyora eng qimmat resurslardan biri bo‘lgan melanj qazib olinadigan joy hisoblanadi.
Uchinchi film “Dyuna messiyasi” va taxminan “Dyuna bolalari” asaridagi voqealarga asoslanadi. Tomoshabinlar tanish qahramonlar bilan bir qatorda yangi personajlarni ham ko‘rishadi.
Bu safar Vilnyov filmni raqamli kamera o‘rniga plyonkada suratga olishga qaror qilgan — bu usul, rejissyorning so‘zlariga ko‘ra, filmga o‘ziga xos atmosfera va vizual chuqurlik beradi, hikoyaning epik ko‘lamini yanada kuchaytiradi.
Syujet tafsilotlari hozircha sir tutilayotgan bo‘lsa-da, muxlislar ijtimoiy tarmoqlarda allaqachon qahramonlarning taqdirlari va ehtimoliy voqealar rivojini muhokama qilmoqda. Kutilishicha, filmda ulkan jang sahnalari, cho‘l qurti monstrlari va Atreydeslar uyi intrigalari yana markazda bo‘ladi.
Shuningdek, aktyor Robert Pattinson uchinchi film jamoasiga qo‘shilgani ma’lum. U cho‘l sahnalaridagi suratga olish jarayoni haqida o‘z taassurotlarini bo‘lishgan.
