Jeyms Kemeronning yangi filmi — “Avatar: Olov va kul” — rasmiy ravishda 3 soat 15 daqiqa davom etishi ma’lum bo‘ldi. Bu uni avvalgi qism — “Suv yo‘li”dan ham uzunroq qiladi. AMC kinotarmog‘i xabar berishicha, yangi film oldingisidan uch daqiqa uzoqroq bo‘ladi.
Muxlislar uchun bu yangilik kutilmagan emas — Kemeron ilgari ham uchinchi film avvalgidan uzunroq bo‘lishini aytgan edi. Rejissyorning so‘zlariga ko‘ra, ikkinchi filmda “birinchi qismga sig‘magan juda ko‘p ajoyib g‘oyalar” bor edi, shu sababli u “tez yuruvchi poezd kabi” o‘tgan.
Yangi filmda tomoshabinlar Na’vi xalqining yangi qabilasi — Mangkvan, ya’ni “Kul odamlari” bilan tanishishadi. Kemeron bu qabila orqali Na’vilarning boshqa madaniyatini, avval ko‘rsatilmagan jihatlarini ochib berishni istayotganini ta’kidladi.
Franshizada sevimli qahramonlar yana qaytadi:
- Jeyk Salli (Sem Uortington),
- Neytiri (Zoi Saldanya),
- Kiri (Sigurni Uiver),
shuningdek, yangi obrazlar ham paydo bo‘ladi — jumladan, Una Chaplin ijro etgan Varang nomli qahramon.
Film syujeti Pandora sayyorasida yangi xavflar va ulkan janglarni o‘z ichiga oladi — Jeyk va uning oilasi yana tahdidga duch keladi.
Shuningdek, ilgari Jeyms Kemeron “Avatar” olamiga asoslangan animatsion antologiya yaratish rejasini ham e’lon qilgan edi.
