Model va tadbirkor Xeyli Biber GQ jurnali uchun bergan intervyusida turmushi, onalik va mashhurlik bilan bog‘liq bosim haqida ochiqchasiga so‘zlab berdi.
So‘nggi paytlarda jurnalning yangi soni uchun suratga tushgan Xeyli, intervyuda nafaqat onalik quvonchlari, balki Jastin Biber bilan bo‘lgan nikohidagi sinovlar haqida ham gapirdi. Uning so‘zlariga ko‘ra, ular “qadam-baqadam oldinga yurib”, shaxsiy hayot, ota-onalik va omma e’tibori o‘rtasida muvozanat topishni o‘rganishmoqda.
“Biz shunchaki har kuni yashaymiz,” — dedi Xeyli. — “Biz hozirgi hayotimizdan xotirjam va ishonchdamiz.”
Uning ta’kidlashicha, ular farzandini juda himoya qilishadi, lekin shu bilan birga mashhurlikning ochiqligini qabul qilishga harakat qilishadi:
“Biz o‘g‘limizni himoya qilamiz, bu o‘zgarmaydi. Ammo hayotimiz hammaga ochiq, biz esa muammolarni kelganida hal qilamiz.”
Xeyli, o‘z so‘zlariga ko‘ra, ular Jastin bilan muxlislarga hayotining bir qismini ko‘rsatish, boshqa qismini esa shaxsiy saqlash o‘rtasida sog‘lom muvozanat topganlar:
“Biz bir-birimizni qo‘llab-quvvatlab yashaymiz. Bizning nikohimiz ideal emas, lekin u — haqiqiy.”
Juftlik 2018-yilda turmush qurgan, 2024-yil avgustida esa ularning o‘g‘li Jek Blyuz dunyoga kelgan. Xeylining so‘zlariga ko‘ra, onalik hayotini butunlay o‘zgartirgan:
“Hech kim seni bunga tayyorlay olmaydi, buni faqat o‘zing boshdan kechirsanggina tushunasan. Ammo endi o‘zimni ancha ishonchli his qilaman.”
U onalikni “bir vaqtning o‘zida qo‘rqinchli, ammo ilhomlantiruvchi tajriba” deb atadi.
Suhbat davomida Xeyli Jastinning unga bo‘lgan qo‘llab-quvvatlovi haqida ham gapirdi — xususan, u Jastinning Rhode kosmetika brendi muxlisi ekanini faxr bilan aytdi:
“Erim Rhode brendini boshidan beri ishlatadi va juda yoqtiradi. Hatto erkak do‘stlarim ham bu mahsulotlarga oshufta.”
Shuningdek, Xeyli o‘g‘li bilan yordamchilarsiz uddalash mushkul ekanini ochiq aytib o‘tdi.
“Menda to‘liq ish kuniga ega yordamchi bor va men bundan uyalganim yo‘q. Yordam bo‘lmaganda, men ishlarimni bajara olmagan bo‘lardim.”
Agar Jek onasi bilan bo‘lmasa, u otasi yoki yaqinlari bilan vaqt o‘tkazadi:
“U doimo oilasi bilan, yoki men bilan, yoki Jastin bilan bo‘ladi.”
Bu intervyu Jastin Biberdan keyingi paytlarda chiqqan “Swag” albomidagi qo‘shiqlarda munosabatlardagi taranglik aks etgani haqida gap-so‘zlar chiqqanidan keyin paydo bo‘ldi. Masalan, “Walking Away” qo‘shig‘ida Jastin:
“Biz jahl bilan so‘zlar aytamiz, sabrimiz tugaydi, balki to‘xtab, rahm-shafqat nima ekanini eslashimiz kerakdir. Ammo, sevgilim, men ketmayman. Sen mening olmosimsan, men senga uzuk berdim va o‘zgarishimga va’da berdim,” — deb kuylaydi.
Shunga qaramay, so‘nggi paytdagi suratlarda juftlik yana baxtli ko‘rinmoqda. Kendall Jennerning 30 yoshini nishonlash paytida olingan kadrlarda ular bir-birini quchoqlab, munosabatlaridagi inqiroz ortda qolgandek taassurot uyg‘otdi.
