Rossiyaning “Gazprom-Media” xoldingi Wildberries, Ozon va Avito bilan hamkorlikda buyurtmalarni topshirish punktlari (PVB) hayoti haqida komedik serial — sitkom suratga olishni rejalashtirmoqda. Bu haqda xolding bosh direktori Aleksandr Jarov ma’lum qildi.
Loyihaning ishchi nomi “PVB” (“Buyurtmalarni topshirish punkti”) bo‘lib, u yuzlab qismlardan iborat bo‘lishi rejalashtirilgan. Serialning premyerasi 2027-yilda bo‘lib o‘tishi mumkin.
Jarovning aytishicha, loyiha “Gazprom-Media” va mamlakatning yetakchi marketpleyslari o‘rtasidagi strategik hamkorlikning bir qismi hisoblanadi. Uning fikricha, marketpleyslar uchun videokontent ishlab chiqarish asosiy faoliyat yo‘nalishi emas, shu sababli ular bu borada tajribali media kompaniyalar bilan ishlashni afzal ko‘rmoqda.
Biroq, bosh direktor muzokaralar oson kechmayotganini ham tan oldi. Uning ta’kidlashicha, media kompaniyalari ijodiy yondashuvga ko‘proq e’tibor bersa, marketpleyslar amaliy natijalarni ustuvor deb biladi.
