Turk matbuotida tarqalgan xabarlarga ko‘ra, qo‘shiqchi Riza Tamer vafot etgan. Uning o‘limi shubhali deb qaralmoqda.
Voqea Shenkal ko‘chasida soat taxminan 20:00 da sodir bo‘lgan. Ma’lumotlarga ko‘ra, Riza Tamer Shishman unga buyurilgan dorilarni qabul qilganidan so‘ng o‘zini yomon his qila boshlagan. Kelib tushgan signal asosida joyga tibbiy brigadalar yuborilgan. Birinchi yordam ko‘rsatilgach, Riza Tamer do‘sti Sh.T. bilan birga tez yordam mashinasida Bodrum davlat shifoxonasiga olib borilgan. Keyinchalik ahvoli yomonlashgani sababli u hududdagi xususiy klinikaga o‘tkazilgan, biroq shifokorlarning barcha sa’y-harakatlariga qaramay, ertalab vafot etgan.
“Men uning vafoti haqidagi xabarni 10 daqiqa oldin oldim, juda hayratdaman”, — dedi qo‘shiqchining matbuot kotibi.
Shubhali holatlar aniqlangach, prokuratura rasmiy tergov boshladi. Zaharlanish ehtimoli ko‘rib chiqilmoqda. Riza Tamerning jasadi aniq o‘lim sababini aniqlash uchun Mug‘la sud-tibbiyot institutiga yuboriladi.
“Popstar Turkey 2004”da ishtirok etib mashhurlikka erishgan va “Benden Sonra” qo‘shig‘i bilan tanilgan Riza Tamer o‘z faoliyati davomida katta muxlislar auditoriyasini to‘plagan. Xonandaning vafoti jamoatchilikda katta rezonans uyg‘otdi. Uning hamkasblari va shou-biznes vakillari hamdardlik bildirishdi.
Deniz Seki: “Ba’zan hayot aynan ovozingni topgan paytingda seni jim qiladi… Sening ovozing bizda va qo‘shiqlaringda yashaydi”.
Zeynep Bastik: “Men juda qayg‘udaman va larzaga tushdim. Uning iste’dodiga guvoh bo‘lish menga nasib qilgan. Tinch yot, Riza”.
Riza Tamerning dafn marosimi shanba kuni, 18-aprel kuni peshin namozidan so‘ng Akyaqa masjidida o‘tkaziladi. U Mug‘ladagi Akyaqa qabristoniga dafn etiladi.
Shuningdek, ilgari Riza Tamer ajrashuvdan keyin hayotidagi og‘ir davr haqida gapirgan edi; o‘sha paytda u taxminan uch yil ko‘chalarda yashagan. “Odamlar meni asfalt ustidan ko‘tarib olishgan. Men ularga doim qarzdorman”, — degan edi u intervyularidan birida.
O‘lim sabablari bo‘yicha tergov davom etmoqda. Sud-tibbiy ekspertizasining rasmiy xulosalari hali e’lon qilinmagan.
