Teylor Svift va Trevis Kelsining to‘yidan keyin “Madison Square Garden” arenasining bir necha xodimi ishidan chetlatildi. Page Six nashrining manbalarga tayanib xabar berishicha, bunga marosimdan avval sport majmuasi hududida olingan suratlar sabab bo‘lgan.
Manbalarga ko‘ra, dastlab ikki nafar sahna xodimi obyektdan chetlatilgan. Biroq boshqa bir manbaga ko‘ra, chetlatilganlar soni to‘rt nafarga yetgan. Ular kasaba uyushmasi a’zolari bo‘lgani va arena shtatida rasman ishlamagani sababli to‘liq ishdan bo‘shatilmagan. Biroq endilikda ularga “Madison Square Garden”da ishlash taqiqlanadi, ammo holding tasarrufidagi boshqa maydonlarda faoliyatini davom ettirishi mumkin.
Yulduzli juftlikning munosabatlari 2023-yilda boshlangan. Ularning sevgisi Kelsi Sviftga telefon raqami yozilgan do‘stlik bilaguzugini topshirishidan boshlangan. Keyinchalik xonanda sportchining o‘yinlariga, Kelsi esa Sviftning konsertlariga muntazam tashrif buyura boshlagan. 2025-yil avgust oyida ular unashtirilganini e’lon qilgan, endilikda esa rasman turmush qurdi.
