Turk estradasining mashhur vakili, bastakor va qo‘shiqchi Serdar O‘rtach yaqinda bergan intervyusida ijtimoiy tarmoqlarda va ommaviy axborot vositalarida katta rezonansga sabab bo‘lgan bayonot bilan chiqdi. San’atkor o‘zining yagona mulki bo‘lgan Istanbuldagi Bosfor bo‘yidagi hashamatli villasini yillar davomida xizmatini qilgan uy xizmatchilariga meros qoldirishini ma’lum qildi.
Serdar O‘rtach Istanbulda joylashgan, 8 xonali va 750 kvadrat metrli villani bir umr mehnatkash xodimlariga vasiyat qilganini quyidagicha izohlagan:
“Farzandim yo‘q, yaqin qarindoshlarim bilan aloqam sust. Menga sadoqat bilan xizmat qilgan, yonimda bo‘lgan xodimlarimni oila a’zolarimdek ko‘raman. Shuning uchun ularni begonalarga qoldirib keta olmayman. Villa ularniki bo‘lsin.”
Bu qaror san’atkorning sog‘lig‘i yomonlashganidan so‘ng e’lon qilindi. Ma’lumki, Serdar O‘rtach bir necha yildan beri skleroz (MS) kasalligi bilan kurashmoqda. U sog‘ligi haqida ochiq gapirib, “10–15 yillik umrim qolgan bo‘lishi mumkin” degan tahminni ham bildirgan edi.
Mol-mulk emas, inson qadriyatlari
San’atkorning bu qarori ko‘plab muxlislar va jurnalistlar tomonidan ijobiy kutib olindi. Ayniqsa, boylikni yaqinlariga yoki biznes sheriklariga emas, oddiy insonlarga – xizmatkorlarga qoldirish g‘oyasi jamiyatda mehr, minnatdorchilik va insoniylik qadriyatlarini yana bir bor yodga soldi.
Ammo ba’zilar bu haqida “Villani uy xizmatchilariga qimorda yutqazib qo‘ygan shekili” hazilomuz fikrlar ham bildirgan.
