Pixar o‘zining 40 yilligi munosabati bilan studiya introsida ko‘rinadigan mashhur Luxo Jr. chirog‘ining interaktiv versiyasini taqdim etdi.
Endi Pixar muxlislari filmlar boshida sakrab chiqadigan chiroqni uyida ham ko‘rishi mumkin. Qurilma harakat va tovushni sezadi, o‘zi harakatlanadi hamda Pixar introsiga xos tovushlarni chiqaradi. Uning tashqi ko‘rinishi ham mashhur animatsion ramzga juda o‘xshash qilib yaratilgan. Qizig‘i, chiroqning o‘zi yorug‘lik bermaydi. Bunga Pixar’ning 2009-yilda Luxo Jr. nomi ostida yoritish moslamasini sotishga uringani va norvegiyalik Luxo ASA kompaniyasi bilan yuzaga kelgan huquqiy kelishmovchilik sabab bo‘lgan. Yangi Pixar Lamp Buyuk Britaniyada 17-avgustdan sotuvga chiqariladi. Uning narxi 100 funt sterling.
Luxo Jr. chirog‘i 1986-yilda Pixar’ning qisqa metrajli animatsion filmida ilk bor paydo bo‘lgan. Oradan yillar o‘tib, oddiygina sakrab yuruvchi chiroq Pixar studiyasining eng taniqli ramzlaridan biriga aylandi.
