Yaponiyalik taniqli yozuvchi, ssenariynavis va rejissyor Ryu Murakami 74 yoshida vafot etdi. Bu haqda 23-oktyabr kuni uning kitoblarini nashr etib kelgan Gentosha nashriyoti ma’lum qildi.
Yozuvchi 17-oktyabr kuni o‘z uyida hayotdan ko‘z yumgan. Uning o‘lim sababi oshkor etilmagan. Dafn marosimi faqat yaqin oila a’zolari ishtirokida o‘tkazilgan.
Ryu Murakami 1952-yil 19-fevralda Yaponiyaning Sasebo shahrida tug‘ilgan. U 1976-yilda, hali talabalik davridayoq, “Shaffof moviy” (Almost Transparent Blue) debyut romani bilan mashhurlikka erishgan. Mazkur asar unga Yaponiyaning nufuzli Akutagava adabiy mukofotini olib kelgan.
Adib “Miso sho‘rvasida” (In the Miso Soup) va “Tashlab ketilganlar” (Coin Locker Babies) kabi romanlari bilan ham tanilgan. Uning ijodida jamiyatning qorong‘i tomonlari, zo‘ravonlik va inson ruhiyatidagi murakkab kechinmalar muhim o‘rin egallagan.
Ta’kidlash joizki, Ryu Murakamini yana bir mashhur yapon yozuvchisi — Haruki Murakami bilan adashtirmaslik kerak. Ular qarindosh emas, faqat familiyadosh. “Norveg o‘rmoni” romani muallifi Haruki Murakami hayot.
