Yangi chiqadigan filmlarning haddan tashqari faol reklama kampaniyalari ijtimoiy tarmoqlarni to‘ldirib yubordi. Har kuni yangi tizerlar, sizib chiqqan kadrlar, sahna orti lavhalari va boshqa spoylerlar paydo bo‘lib, internet foydalanuvchilarida charchash effektini yuzaga keltirmoqda, deb yozadi The Guardian.
Bir necha hafta oldin Nyu-Yorkda “Qattiqqo‘l xonim 2” filmining suratga olish jarayoni boshlandi. Shundan beri tarmoqlarda tinimsiz yangi sizib chiqqan kadrlar paydo bo‘lishda davom etmoqda. O‘tgan hafta esa Sidney Suini suratga olish maydonchasida ko‘ringani aks etgan video virusga aylandi. Hali aktrisaning filmda ishtirok etishi noma’lum, biroq ijtimoiy tarmoq foydalanuvchilari allaqachon buni spoyler sifatida qabul qilib, norozilik bildirishmoqda: “Voy, rahmat, sevimli filmimni kutish zavqini buzib qo‘ydingiz. Bizda hech qachon yaxshi narsa qolmaydi”, – deb yozadi ulardan biri.
Kontentning haddan tashqari ko‘pligi tomoshabinlarni zeriktirib, hali chiqmagan filmga nisbatan ham salbiy hissiyot uyg‘otmoqda. Avvalroq internet foydalanuvchilari hazillashib, “Qatiqqo‘l xonim 2” premyerasiga kelib syujetning barcha tafsilotlari ma’lum bo‘lishini aytishgan edi. Hozirda kadrlar sonini hisobga olsak, bu hazil haqiqatga tobora yaqinlashmoqda.
Shuningdek, Enn Xeteuey suratga olish maydonchasidan o‘z fotosini “taqiqlangan” ijtimoiy tarmoqda birinchi bo‘lib joylashtirdi. Aktrisa surat ostiga: “Endi Saks, 2025-yil talqini” deb yozgan. Izohlar bo‘limiga qaraganda, foydalanuvchilarga sevimli qahramonining o‘zgarishi yoqqan.
