Taqiqlangan moddalar kontrabandasi bilan bog‘liq ish bo‘yicha Qozog‘istonda hibsga olingan reper Navai garov evaziga ozodlikka chiqarildi.
Mash Telegram kanalining xabar berishicha, sud majlisida reperga nisbatan qo‘llangan ehtiyot chorasi o‘zgartirilgan. Shundan so‘ng u hibsdan ozod qilingan.
Avvalroq asl ismi Navai Bakirov bo‘lgan ijrochi Qozog‘iston chegarasida taqiqlangan moddalar bilan bog‘liq gumon asosida qo‘lga olingan va Taraz shahridagi 13-sonli tergov hibsxonasiga joylashtirilgan edi.
Mazkur voqeadan so‘ng reperning yaqin kunlarga rejalashtirilgan konsertlari bekor qilingan.
Ma’lumotlarga ko‘ra, Navai hozirda Rossiyaga qaytgan. Biroq unga nisbatan ochilgan jinoyat ishi yakunlangani haqida xabar berilmagan.
