The Walt Disney Company studiyasi uzoq kutilgan ikki animatsion loyiha — “Lilo va Stich 2” hamda “Superoila 3” filmlarining chiqish sanalarini rasman e’lon qildi. Endi ushbu mashhur multfilmlar muxlislari yangi qismlarni kutib olishga tayyorlanmoqda.
Yangi bosh direktor Josh D’Amaro bu rejalarni aksiyadorlar yig‘ilishida ma’lum qilgan. Qizig‘i shundaki, studiya avvaldan Comscore taqvimida aniq sanalarni band qilgan, biroq dastlab loyihalar nomi oshkor etilmagan edi.
So‘nggi dam olish kunlari, Xotira kuni (Memorial Day) munosabati bilan chiqqan “Lilo va Stich” 4 kun ichida 182 million dollar yig‘ib, hatto “Top Gan: Maverik” rekordlarini ham ortda qoldirdi. “Lilo va Stich”ning bunday muvaffaqiyati kutilmagan emas, chunki u o‘tgan yilning eng kassabop filmlaridan biri bo‘lgan.
“Superoila” franshizasiga kelsak, uning dastlabki ikki qismi jahon bo‘ylab deyarli 2 milliard dollar daromad qilgan. Birinchi film 2004-yilda, ikkinchisi esa 14 yildan so‘ng — 2018-yilda chiqdi. Yangi qismga rejissyor sifatida Piter Son tayinlangan.
“Lilo va Stich” remeykining davomi 2028-yil 28-mayda namoyish etiladi. “Superoila 3” esa 2028-yil 16-iyunda katta ekranlarga chiqishi rejalashtirilgan.
