Gollivudning eng nufuzli aktyorlaridan biri — Leonardo Di Kaprio — sun’iy intellektning kino va san’at sanoatidagi o‘rniga nisbatan keskin norozilik bildirdi. U TIME jurnaliga bergan intervyusida sun’iy intellekt yordamida yaratilayotgan filmlar, sahnalar va ijodiy mahsulotlarni “san’at emas” deb atadi va bunday jarayonlardan chuqur xavotir olayotganini yashirmadi.
“Bunda insoniylik yo‘q” — Di Kaprio AI ijodi haqida
Aktyorning fikricha, haqiqiy san’atning asosiy manbai — insonning tuyg‘usi, ruhiyati, tajribasi va ijodiy qarashi. “Haqiqiy san’at faqat insondan tug‘ilishi mumkin”, — deydi u.
Di Kaprioning fikricha, sun’iy intellekt yaratgan mahsulotlar texnik jihatdan mukammal ko‘rinsa ham, ularda insoniylik, ruh va chuqur ma’no yo‘q. U bilan yaratilgan videolar, mashhur yulduzlarning ovozini sun’iy ravishda jonlantirish yoki ularning qiyofasini qayta yasash — internetdagi qisqa umrli trendlar, xolos.
“Bir marta kuldiradi, keyin unutiladi”
Di Kaprio internetda tarqaladigan AI roliklarni qiziqarli eksperiment sifatida qabul qiladi, ammo bularning san’atga aloqasi yo‘qligini ta’kidlaydi. Uning aytishicha, bunday mahsulotlar bir martalik “wow-effekt” bo‘lishi mumkin, lekin ular vaqt sinovidan o‘tmaydi, odamni o‘ziga qayta va qayta tortmaydi.
Bu fikr ko‘plab rejissyorlar va aktyorlar orasidagi umumiy xavotirni takrorlaydi: AI inson mehnatini almashtirishi, kreativ jarayonni arzonlashtirishi va mualliflik huquqlariga katta tahdid solishi mumkin. Leonardo Di Kaprio sun’iy intellektni yomon ko‘rmaydi — ammo uni san’atning o‘rniga qo‘yishni keskin rad etadi. Unga ko‘ra, texnologiya yordamchi bo‘lishi kerak, lekin ijodning o‘rnini egallashi emas.
Uning oddiy, lekin samarali hayotiy falsafasi bor:
“Aytiladigan gap bo‘lsa — ommaga chiq. Bo‘lmasa — imkon qadar ko‘zdan yiroq bo‘l.”
Shu sababli, u kundalik hayotda ko‘pincha kepka va ko‘zoynakda yurganini ham tan oldi. Bu nafaqat uslub, balki nazoratsiz suratga olinadigan kameralar va ijtimoiy bosimdan himoya qilishning bir yo‘li deb biladi.
