Netflix’ning mashhur “G‘alati narsalar” seriali nafaqat tomoshabinlar orasida katta shov-shuvga sabab bo‘ldi, balki AQSh iqtisodiyotiga ham ulkan foyda keltirdi. Mutaxassislar hisob-kitobiga ko‘ra, ushbu loyiha mamlakat iqtisodiyotiga 1,4 milliard dollar miqdorida hissa qo‘shgan.
Eng katta iqtisodiy foyda serialning asosiy qismi suratga olingan Jorjiya shtati hissasiga to‘g‘ri keldi. Bu hududda yaratilgan sahnalar va infratuzilma orqali shtat yalpi ichki mahsulotiga qo‘shilgan hissa 650 million dollarga baholandi. Serial ishlab chiqarilishi mahalliy mutaxassislar bandligini oshirib, xizmatlar va turizm rivojiga ham turtki berdi.
Ikkinchi o‘rinni Kaliforniya shtati egalladi. Bu yerda olib borilgan suratga olish va postprodakshn ishlari orqali shtat iqtisodiyotiga yana 500 million dollar miqdorida daromad keltirildi.
Bundan tashqari, serialning mashhurligi ko‘plab sohalarga ijobiy ta’sir ko‘rsatdi. Suratga olish joylari mashhur sayyohlik maskanlariga aylandi, 1980-yillar madaniyati, musiqasi va kiyinish uslubi yana ommalashdi.
Beshinchi mavsumning yakuniy qismi efirga uzatilishidan oldin ham serialning umumiy tomosha qilinishlar soni 1,2 milliarddan oshdi. Shu tariqa, “G‘alati narsalar” Netflix tarixidagi eng mashhur loyiha sifatida e’tirof etildi va “Kalmar o‘yini” hamda “Uensdey” kabi mashhur loyihalarni ortda qoldirdi.
Mazkur muvaffaqiyat yirik striming loyihalari nafaqat madaniy hodisaga, balki butun mintaqalar iqtisodiyotiga ta’sir ko‘rsata oladigan kuchli omil ekanini yana bir bor isbotladi.
