Netflix amerikalik qo‘shiqchi va aktrisa Jessika Simpson hayoti va ijodiga bag‘ishlangan hujjatli filmni taqdim etadi.
Jessika Simpson faoliyati davomida 20 milliondan ortiq albom nusxasini sotgan. U, shuningdek, 2003–2005-yillarda efirga uzatilgan “Yosh kelin-kuyovlar” realiti-shousi orqali keng auditoriyaga tanilib, Britni Spirs, Kristina Agilera va Mendi Mur bilan bir davrda mashhurlikka erishgan.
Hujjatli filmda Simpsonning shon-shuhrat cho‘qqisiga ko‘tarilishi, musiqiy faoliyati va shaxsiy hayotidagi muhim davrlar yoritiladi. Film prodyuserlaridan biri ham “Yosh kelin-kuyovlar” loyihasining muallifi Van Toffler bo‘ladi. Hujjatli filmni uning Gunpowder & Sky kompaniyasi ishlab chiqaradi. Film rejissyori esa Jo Perlman.
Ma’lumot o‘rnida, hujjatli film premyerasi xonandaning musiqiy faoliyatga qaytganidan bir yil o’tib namoyish etiladi. Jessika Simpson 15 yillik tanaffusdan so‘ng 2025-yilda “Nashville Canyon: Part 1 & Part 2” nomli mini-albomi bilan ijodga qaytgan edi.
