Google yosh kinoijodkorlarni sun’iy intellekt imkoniyatlari bilan tanishtirish maqsadida “Flow Sessions” dasturini yo‘lga qo‘ydi. Olti haftalik loyiha ishtirokchilari kompaniyaning Flow AI video yaratish platformasidan foydalanib, o‘z qisqa metrajli filmlarini suratga oldi.
Dastur yakunida Nyu-Yorkdagi Metrograph kinoteatrida AI yordamida yaratilgan 11 ta qisqa film namoyish etildi. Loyiha davomida ishtirokchilarga mentorlar ham amaliy ko‘mak bergan.
Google vakillarining ta’kidlashicha, Flow murakkab texnik jarayonlarni soddalashtirib, professional tajribaga ega bo‘lmagan ijodkorlarga ham o‘z hikoyalarini ekranga olib chiqish imkonini beradi. Biroq, AI texnologiyalarining kino sanoatidagi o‘rni hanuz bahsli mavzu bo‘lib qolmoqda. Xususan, mualliflik huquqi va sun’iy intellektning ijodkorlar faoliyatiga ta’siri yuzasidan munozaralar davom etmoqda.
Google esa sun’iy intellektni ijodkorlar o‘rnini bosuvchi emas, balki ularning g‘oyalarini ro‘yobga chiqarishga yordam beradigan vosita sifatida taqdim etmoqda.
