Fransuz modeli va aktrisasi, bolaligida “dunyoning eng go‘zal qizi” deya tanilgan Tilan Blondo 29 yoshli musiqachi va DJ Ben Attal bilan turmush qurdi. Juftlikning to‘yi Fransiya poytaxti Parijda romantik muhitda o‘tkazildi.
Tilan va Ben unashtirilgani e’lon qilinganidan uch oy o‘tib rasman nikohdan o‘tdi. Ular odatiy to‘y an’anasini buzib, marosimga kumushrang Porsche 356 Speedster kabrioletida birgalikda yetib kelishgan. Ularning ushbu harakati esa mehmonlarda katta taassurot qoldirgan.
Tilan va Ben 2020-yildan buyon munosabatda bo’lib, ular joriy yilning mart oyida unashtirilganini e’lon qilgan edi. Ben Attal Gretsiyadagi romantik sayohat chog‘ida, Egey dengizi sohilida Tilan Blondoga turmush qurishni taklif qilgan. Model o‘shanda sevgilisi hadya qilgan yirik brilliant ko‘zli uzugini ham muxlislariga namoyish etgan edi.
Eslatib o‘tamiz, Tilan Blondo modellik faoliyatini to‘rt yoshida boshlagan. U olti yoshida Vogue Enfants jurnali tomonidan “dunyoning eng go‘zal qizi” deb e’tirof etilgach, xalqaro miqyosda mashhurlikka erishgan.
