Bryus Uillisning rafiqasi Emma Heming-Uillis Conversations With Cam podkastida afsonaviy aktyorning sog‘lig‘i haqida gapirdi. U 2023-yil boshida tashxis qo‘yilgan frontotemporal demensiya bilan yashamoqda.
Emmaning so‘zlariga ko‘ra, 69 yoshli Uillis o‘z tashxisidan bexabar. Bu anosognoziya deb ataladigan kam uchraydigan nevrologik holat bilan bog‘liq bo‘lib, unda inson o‘zida kasallik borligini anglay olmaydi. Miya go‘yo bu ma’lumotni bloklab, sodir bo‘layotgan o‘zgarishlar ko‘lamini tushunishga yo‘l qo‘ymaydi.
“Odamlar buni inkor etish deb o‘ylashi mumkin, ammo aslida bu kasallikning o‘ziga xos xususiyati. Bryus hech qachon alomatlarni yagona manzara sifatida bog‘lamagan va men chin dildan xursandmanki, u o‘z tashxisini bilmaydi”, — dedi Emma.
Kasallik rivojlanayotganiga qaramay, Uillis yaqinlarining mehr va g‘amxo‘rligi bilan o‘ralgan. Uning nutqi deyarli butunlay yo‘qolgan, biroq u yaqinlari bilan muloqot qilishning boshqa yo‘llarini topgan. Aktyor buni imo-ishoralar, teginishlar va yuz ifodalari orqali amalga oshiradi. Emma ta’kidlashicha, eri hanuz bolalarini, nabiralarini va uni taniydi.
Eslatib o‘tamiz, Bryus Uillis aktyorlik faoliyatini televideniye va teatrda epizodik rollar bilan boshlagan. Ammo haqiqiy yutuq 1985 yilda, u “Oy nuri ostidagi detektiv agentligi” serialida bosh rolni olganida yuz berdi. Ushbu roli uchun u “Emmi” va “Oltin globus” mukofotlariga sazovor bo‘lgan. Jahon miqyosidagi shuhratni Jon Makleyn roli olib keldi. Uillis turli janrlarda muvaffaqiyatli ishlagan: “Oltinchi tuyg‘u” kabi trillerlardan tortib, “Beshinchi element” va “12 maymun” kabi fantastik filmlargacha.
Avvalroq Bryus Uillisning oilasi aktyor vafotidan so‘ng uning miyasini ilmiy tadqiqotlar uchun ehson qilishga tayyor ekani ma’lum bo‘lgan edi.
