Gollivudda Bred Pitt farzandlari bilan o‘rtasidagi mojaro haqida gap-so‘zlar tarqalganiga ancha bo‘lgan. Endi ma’lum bo‘lishicha, o‘g‘li Meddoks ham butunlay Pitt familiyasidan voz kechgan.
Onasining yangi “Kutyur” filmi titrlarida Meddoks rejissyor assistenti sifatida Meddoks Joli nomi bilan ko‘rsatilgan. Avvalroq u Anjelinaning “Mariya” filmida Joli-Pitt familiyasi bilan qayd etilgan edi.
Bu qarorning sababi 2016-yilda sodir bo‘lgan voqea bilan bog‘liq bo‘lishi mumkin. O‘shanda Pitt va Joli o‘rtasida samolyot bortida jiddiy mojaro yuz bergan. Unga Meddoks aralashishga harakat qilgan, biroq Pitt o‘g‘liga nisbatan tajovuzkor harakat qilgani aytilgan.
Meddoks bunday qarorga kelgan birinchi farzand emas — 2023-yilda Zahara ham otasining familiyasidan voz kechgan. Oradan bir yil o‘tib, Vivyen Brodveydagi “Outsiders” myuzikli dasturida faqat Joli familiyasi bilan paydo bo‘lgan, so‘ng Shaylo ham familiyasini o‘zgartirish uchun hujjat topshirgan.
Bred Pitt ham, Anjelina Joli ham vaziyatga izoh bermagan. Avvalroq OAV Pitt farzandlari bilan masofa paydo bo‘lgani sababli ranjiyotgani haqida yozgan edi.
Eslatib o‘tamiz, yulduzlarning ajrimi Gollivuddagi eng shov-shuvli voqealardan biri bo‘lgan. 2016-yilda Joli ajrashish uchun ariza berib, bolalar ustidan yakka vasiylik talab qilgan. Vasiylik masalasi 2021-yilda hal bo‘lgan (u Angelina foydasiga hal qilingan). Mol-mulkni bo‘lish masalasi esa hanuz davom etmoqda — ular vino zavodini bo‘lisha olmayapti.
