Moskvada ilk bor o‘tkazilgan “Ayollar tomonidan yaratilgan” xalqaro kinofestivali o‘z yakuniga yetdi. 8–12-iyul kunlari bo‘lib o‘tgan festival ayol kinematograflarning ijodiga bag‘ishlanib, Rossiya, Ispaniya, Fransiya, Hindiston, Tunis va Qatar filmlarini bir maydonga jamladi.
Festivalning bosh mukofoti ispaniyalik rejissyor Eva Libertad suratga olgan “Kar” (“Глухая”/ Sorda) filmiga nasib etdi. Kartina onalik, o‘zini va boshqalarni qabul qilishi hamda eshitishida nuqsoni bo‘lgan insonlar o‘rtasidagi o‘zaro tushunish haqida hikoya qiladi.
“Eng yaxshi rejissyor” nominatsiyasida Viktoriya Mokerovaning “Tuyg‘ular” (“Чувства”) filmi g‘olib bo‘ldi. “Eng yaxshi ssenariy” mukofoti esa Yekaterina Gorbachyovaning oilasi hayotidagi haqiqiy voqealar asosida ishlangan “Onamning blyuzi” (“Мамин блюз”) filmiga topshirildi.
Shuningdek, Fransiya–Tunis–Qatar hamkorligida suratga olingan “Va’da qilingan osmon” (“Обещанное небо”) kartinasi birdaniga ikki mukofot – “Eng yaxshi operatorlik ishi” va “Eng yaxshi musiqa” yo‘nalishlarida g‘olib bo‘ldi. “Tomoshabinlar e’tirofi” ga sazovor bo‘lgan film esa Yuliya Voytyukning “Sasha ketayotgan edi” (“Шла Саша”) kartinasi bo‘ldi.
