Angelina Joli va Bred Pittning yana bir farzandi otasining familiyasidan omma oldida voz kechdi. Bu haqda “Page Six” nashri xabar berdi.
Gap ularning o‘g‘li Knoks Jolie-Pittning maktab bitiruv diplomiga oid ma’lumot haqida ketmoqda. Rasmiy ta’lim hujjatida yigitning ismi faqat “Knox Jolie” deb ko‘rsatilgan. E’tiborlisi, bu holat uning 18 yoshga to‘lishiga bir necha hafta qolganda jamoatchilikka ma’lum bo‘ldi. Nashr manbasiga ko‘ra, Anjelina Joli bolalarining otasidan uzoqlashganidan mamnun ko‘rinadi. Boshqa bir manba esa Joli yillar davomida Bred Pitt va farzandlari bilan oilaviy terapiyada qatnashganini ta’kidlab, agar Pittning bolalari bilan munosabatlari yaqin bo‘lmasa, bunga o‘tmishda yuz bergan voqealar sabab bo‘lganini aytgan. Manba so‘zlariga ko‘ra: “U (Bred Pitt) o‘z harakatlari haqida to‘liq ochiq bo‘lmagan va bu bolalarning unga bo‘lgan ishonchiga ta’sir qilgan. Farzandlar uchun bu davr juda og‘ir kechgan.”
Avvalroq boshqa farzandlar — Zahara Joli, Maddoks Joli va Shiloh Joli ham familiyani o‘zgartirish bo‘yicha hujjatlar topshirgan edi. Shuningdek, Vivienne Joli va Paks Joli ham ayrim hollarda faqat onasining familiyasidan foydalangan, biroq ular tomonidan rasmiy ariza berilgani haqida hozircha ma’lumot yo‘q. Aytish joizki, yaqinda internetda Knoksning boks ringidagi videosi tarqalganidan so‘ng, ko‘plab foydalanuvchilar uni otasi Bred Pittning “Fight Club” filmidagi qahramoniga o‘xshatishdi.
