Amerikalik taniqli aktrisa Anjelina Joli yaqin orada AQSHni tark etib, Yevropada yashashni rejalashtirayotgani haqida xabarlar tarqalmoqda. Insayderlar keltirayotgan ayrim dalillar bu taxminlarni yanada kuchaytirmoqda. Xususan, aktrisaning Los-Anjelesdagi ko‘chmas mulki savdoga qo‘yilgani bunday mish-mishlarga asos bo‘ldi.
People nashrining ma’lumotiga ko‘ra, Joli 2016-yildan beri istiqomat qilib kelayotgan hashamatli uyini sotish niyatida. Hozirda u mazkur mulkni ommaviy reklamasiz, faqat jiddiy xaridorlarga shaxsan o‘zi namoyish etmoqda.
Manbalarning ta’kidlashicha, Gollivud yulduzi Yevropaga ko‘chib o‘tish masalasini puxta o‘ylab ko‘rmoqda. Bu qarorning asosiy sababi sifatida shaxsiy hayotni himoyalash va tinchroq muhitda yashash istagi ko‘rsatilmoqda. Chunki Yevropa davlatlarida mashhur insonlar paparatsilar e’tiboriga kamroq tushadi va bu ularga sokinroq hayot kechirish imkonini beradi. Bundan tashqari, jamoatchilik e’tiboridan yiroq bo‘lishni xohlaydigan Jolining farzandlari ham doimiy kuzatuv va shov-shuvlardan uzoqroq yashashni istaydi.
Anjelina Jolining AQSHni qachon tark etishi hozircha aniq emas. Biroq u sobiq turmush o‘rtog‘i Bred Pitt bilan tuzilgan kelishuvga ko‘ra, farzandlari voyaga yetgunga qadar Los-Anjelesda yashashi lozim. Aktrisaning kenja farzandlari 12-iyul kuni 18 yoshga to‘ladi. Shu sababli ayrim manbalar aynan shu sanadan so‘ng Joli Yevropaga ko‘chib o‘tish rejasini amalga oshirishi mumkin, deya taxmin qilmoqda.
