Mashhur britaniyalik qo‘shiqchi, gitarachi va bastakor Kris Ri 74 yoshida vafot etdi. Bu haqda uning oilasi rasmiy bayonot orqali ma’lum qildi. Musiqachi yaqinlari qurshovida, qisqa davom etgan kasallikdan so‘ng hayotdan ko‘z yumgan.
Kris Rining ijodiy faoliyati yarim asrdan ortiq davom etdi. U musiqiy faoliyati davomida 25 ta studiyaviy albom chiqargan bo‘lib, ularning ayrimlari Buyuk Britaniya chartlarida yetakchi o‘rinlarni egallagan. Uning albomlari dunyo bo‘ylab millionlab nusxada sotilgan.
San’atkorning musiqasi rok, blyuz, pop va soul janrlarini uyg‘unlashtirgan bo‘lib, uning xirillagan, darhol taniladigan ovozi hamda slayd-gitaradagi o‘ziga xos uslubi uni boshqa ijrochilardan ajratib turardi.
Kris Rini butun dunyoga tanitgan eng mashhur asarlardan biri — “Driving Home for Christmas” qo‘shig‘i bo‘ldi. Ushbu kompozitsiya dastlab 1980-yillarda chiqarilgan bo‘lsa-da, yillar o‘tib haqiqiy Rojdestvo klassikasiga aylandi va har yili bayram arafasida radio va pleylistlarga qayta-qayta kirib keladi.
Qo‘shiq real voqealardan ilhomlangan: bir paytlar moliyaviy qiyinchiliklar sabab Kris Ri Rojdestvo arafasida uyiga mashinada qaytayotgan, ammo u haydovchilik guvohnomasidan mahrum bo‘lgani uchun rulda uning rafiqasi bo‘lgan. Qorli yo‘lda kechgan uzoq safar davomida qo‘shiqning ohangi va ilk satrlari uning xayolida tug‘ilgan.
Shuningdek, uning repertuarida “Fool (If You Think It’s Over)”, “The Road to Hell”, “Auberge”, “On the Beach” va “Josephine” kabi mashhur asarlar ham bor. “Fool (If You Think It’s Over)” qo‘shig‘i unga AQShda katta muvaffaqiyat keltirgan va hatto “Grammy” mukofotiga nomzod bo‘lishiga sabab bo‘lgan.
Kris Ri hayoti davomida jiddiy sog‘liq muammolari bilan ham kurashgan. 2000-yillarning boshlarida unga oshqozon osti bezi saratoni tashxisi qo‘yilgan, keyinchalik esa insultni ham boshdan kechirgan. Shunga qaramay, u ijoddan voz kechmay, imkon qadar musiqa bilan shug‘ullanishda davom etgan.
Kris Ri nafaqat musiqasi, balki samimiy va hayotiy qo‘shiqlari bilan millionlab muxlislar qalbidan joy oldi. Uning asarlari hali uzoq yillar davomida yo‘llarda, bayramlarda va sokin kechalarda yangraydi.
Marhumdan so‘ng uning rafiqasi Joan va ikki qizi — Jozefin hamda Julia qoldi.
