Selena Gomesning ruhiy salomatlik sohasidagi Wondermind startapi atrofidagi mojaro sudgacha yetib bordi. Investorlar xonandani moliyaviy firibgarlikda ayblab, yetkazilgan zarar uchun tovon undirishni talab qilmoqda.
Gomesning vakillari esa bu ayblovlarni “mutlaqo asossiz” deb atadi. Ular xonandaning firibgarlik yoki boshqa noqonuniy harakatlarga aloqador bo‘lganini tasdiqlovchi hech qanday asos yo‘qligini ta’kidlab, suddan da’voni rad etishni so‘ramoqda.
Wondermind 2021-yilda ruhiy salomatlik va psixologik farovonlikka e’tibor qaratadigan platforma sifatida ishga tushirilgan. Biroq 2025-yil bahoriga kelib, kompaniya jiddiy moliyaviy muammolarga duch kelgan. Mablag‘ yetishmovchiligi sabab xodimlar soni qariyb uchdan ikki qismga qisqartirilgan.
Da’vo nafaqat Selena Gomesga, balki uning onasi Mendi Tifi, Wondermind hammuassisi Daniela Pirson va kompaniyaning o‘ziga qarshi ham kiritilgan. Investorlar ularni firibgarlik va shartnoma shartlarini buzishda ayblamoqda.
Gomesning jamoasi esa xonanda o‘z obro‘sini himoya qilishini va ishning sudda to‘liq yopilishiga erishish uchun kurashishini bildirgan.
