Ispaniyaning Sevilya shahrida yashovchi 57 yoshli Andres Urtado yo‘l chetidan topib olgan kartinani dastlab keraksiz buyum deb o‘ylagan. Biroq, chiroyli romi sabab uyiga olib ketgan. Keyinchalik sun’iy intellekt vositalari va auksion uyi mutaxassislari o‘tkazgan tekshiruv natijasida kartina mashhur ispan rassomi Xoakin Sorolyaning qariyb 150 ming yevroga baholangan original asari ekani aniqlangan.
Ma’lum bo‘lishicha, kartina egalari uni plyajga ketishdan oldin tasodifan yo‘l chetida qoldirib ketgan. Andres Urtado topilma haqida politsiyaga xabar bergan va asar o‘z egalariga qaytarilgan. Halolligi uchun kartina egalari unga minnatdorlik bildirib, sovg‘a yuborishga va’da bergan.
